صبحك الله بالنور والكرامه
يقف شاهين لوهلة مترددا ... يراقب ملامحها ... يبحث عن الكلمات بين خصلات شعرها المتمردة حول وجهها ... هي لم تنم ... متعبه كما هو متعب .... يتراقص ضوء السراي على وجهها فيخفي حمرة الخجل بظلاله ... ويظهر لوعة يعرف شاهين مصدرها دون يقين
"فضه"
تنتبه فضه على صوت حصه تناديها بوجل وصوت حانق... يلتفت شاهين ليجد اخته تقف عند باب غرفتها تراقب الوضع بتنمر
فضه :خير (تقولها بصوت مرتجف)
حصه : ( تصمت قليلا وتنتقل بنظرها من فضه لشاهين والعكس) دامج قاعده تزعبين ماي لا تنسين تترسين الحب اللي يم داري ... (تناظرها من فوق لين تحت ... تمصمص شفايفها باستهجان ) وانت علامك واقف هني ... بتطوفك الصلاة يا حظي (توجه الحديث لشاهين وهي تدخل غرفتها مرة اخرى)
شاهين يرمقها بغضب ... يتمالك نفسه بصعوبه ... يلتفت لفضه ليراها قد غرقت بخجلها وحرجها وقد احتبست دموعها هناك
يهم بان يوجه الحديث لها ليلتفت ويري شنينة بشعرها المشعث قد وقفت على باب المطبخ وخلفها صالحة يراقبان الوضع
تحمل فضه بالدي الماي وتهمس
فضة : من رخصتك ولد عمي
شاهين : مرخوصه (يقولها وهو ينظر اليها بألم)
يلتفت على شنينة وصالحة .. يرمقهم بنظرة حانقة ثم يتجه للباب متوجها للمسجد
شنينة وصالحة يتبادلان النظرات بخبث .. ثم يعودان لمزاولة عملهما بالمطبخ
غيوم محتبسه ... وبوادر شتويه تبشر بهطول المطر ... موزة تدخل البيت تخلع عباتها ... تصفطها وتنادي على شنينة حتى تأتيها بشيء من الماء وتأخذ عباتها منها
تخرج حصه على صوت امها موزه لتبادرها بالسؤال
حصه : هااا يمه ... وين رحتي
موزة : ابد سيرت شويه على بيت حمولتج
حصه :(باستهجان) بيت حمولتي؟؟ شحقه ؟ شلج عندهم
موزة : اللي لي ... ما تعلميني لين متى قعدتج عندنا يا حصيص ... حنا يا يمه محنا عيزانين عنج ... بس المره ما تهد بيتها وتمشي وتسوى سواتج ... اللوادم مو مقصرين معاج ... وحمود شاريج ... غير انج طلعتي الريال من طوره بعوابتج ... وجيادتج
حصه : الحين انا صرت عوبه ... ومن زينه عاد هالحمود ... سبع المسبع .. اللي ما يقدر يسكت امه ولا يقول لها حجوة
موزة :يا حصيص خافي الله ... هذي امه حلوة اللبن ... ناره وجنته ... عيل باجر ترضين شاهين لين صارت له مره تسوي فيني سواتج فيهم
حصة :تخسا وتهبا ... انتفهاا بضروسي
موزة : عيل عقلي يا بنيتي وطيحي اللي براسج ... هذا انا قلت لج ... اخوج مو عاجبته قعدتج عندنا واهو اللي شار علي اكلم خالتج ... وانتي عاد كيفج ... تيتازين معاه
حصة :ايه ... تبون الفكه مني ... (تلتفت لغرفة فضه) وانا ادري ليش ... بس والله والله ...
موزة :ويعه من الله ... قضبي لسانج اهو ... وعلم يوصلج ويتعداج ... بتردين حق ريلج ... شوفي قماشه ... من تيوزت ما سمعنا لها حس ... ولا يت تشكت ... مير ان انتي بس اللي يايبه الشقا لنا ولج ... الله يطقج بعصا الهداية وتعقلين
حصة تفز من مكانها مغتاضه .. متجهه لغرفتها
حصة : الهداية اللي وراها حمود وامه هالنسره ما ابيها .... ولا معتازه لها
"حصه"
تنتفض حصه بمكانها على صوت شاهين
شاهين :زهبي قشج ... ولمي شغلج ... حمود بيمر ياخذج عقب صلاة الظهر
تنظر له حصة بغضب
حصة :بأمر منو بالله؟؟
شاهين :ايا ....(يبتلع الكلمات ) صج انج ما تستحين ...
تفز موزة متجهه لشاهين
موزة :يسلم عمرك يمه ... اتركها عنك ... خلها زافر فيها ابليس ... انا شوي ارد اكلمها واعقلها (تلتف لحصة)
اقول حصه .. بلعي العافية ودشي دارج ... يا مال الماحي ... ما تهيعين من المداحر
حصة :بدش ... بس اذا على بالكم اني ما ادري شالسالفه ... غلطانين ... (ثم تشير لغرفة فضه ) واللي شفته اليوم الفجر ماني ساكته عنه ..
موزة تنتبه لكلام حصه ... شاهين يبعد امه وقد تناثر العقل منه ... يتجه لحصه ... ليلفحها بكف يجعلها تتراجع تحت قوة رزحته
موزة تصرخ باستهجان"شاهين"
شاهين ينتبه ... يلتفت لحصه وهي تمسك خدها والشرر يتطاير من عينيها
يلتقط غترته من الأرض ... ينظر لهما بشيء من الندم ... ثم يخرج من البيت وكأن شياطينه تتبعه .. تلاحقه وتدفعه للهروب
موزة تقف مندهشه ... حصه تقاوم البكاء المغمس بالغضب... صالحة وشنينة يتصافقون بالمطبخ
وفضه ...... ملتصقه بباب غرفتها تكتسحها رعشه تغتصب انفاسها بكل قسوة
...............
يتبع
